कृतज्ञता तथा हार्दिक आभार

अत्यन्त गर्व, गहिरो विनम्रता र भक्तिभावले ओतप्रोत हृदयका साथ हामी Bhutanese Nepali Community of Chatham-Kent Ontario ले गत अगस्ट १४ देखि २१, २०२६ सम्म च्याटम ओन्टारियोमा भव्यतापूर्वक सम्पन्न श्रीमद्भागवत सप्ताह ज्ञानमहायज्ञलाई सफल, सभ्य र अविस्मरणीय बनाउन प्रत्यक्ष वा परोक्ष रूपमा सहयोग गर्नुहुने सम्पूर्ण महानुभावहरूप्रति हार्दिक कृतज्ञता तथा आभार व्यक्त गर्दछौं।

Everest Convention Centre को पवित्र प्राङ्गणमा सम्पन्न यस दिव्य अनुष्ठानले क्यानडाको Bhutanese Nepali डायस्पोराको इतिहासमा एउटा अविस्मरणीय अध्याय थपेको छ। क्यानडा तथा संयुक्त राज्य अमेरिकाका विभिन्न स्थानबाट १० हजारभन्दा बढी भक्तजनहरूको गरिमामय सहभागितामा सम्पन्न यो ऐतिहासिक आध्यात्मिक जमघट भगवान् श्रीकृष्णको असीम कृपाले पूर्ण शान्ति, सद्भाव, अनुशासन र कुनै पनि अप्रिय घटनाविना सफलतापूर्वक सम्पन्न भयो। यो सफलता कुनै एक व्यक्ति वा संस्थाको मात्र नभई हाम्रो सामूहिक एकता, विश्वास, समर्पण, सेवा र सांस्कृतिक गौरवको अनुपम प्रतिफल हो।

यस महायज्ञलाई आफ्नो दिव्य उपस्थितिले पावन बनाउनुभएका पूजनीय आध्यात्मिक गुरुहरू, सन्त-महात्मा तथा विद्वान् आचार्यहरूप्रति हामी उच्च सम्मानसहित नतमस्तक छौँ। विशेषतः टेक्ससबाट पाल्नुभएका प्रमुख कथावाचक आचार्य श्री मेघराज मधुसूदन निरौलाज्यू, पूजनीय स्वामी श्री सुदर्शनाचार्यज्यू, गुरुदेव डा. खेम नेपालज्यू, पण्डित श्री मुकुन्द निरौलाज्यू तथा पण्डित श्री कमल तिम्सिनाज्यूको अमूल्य ज्ञान, शास्त्रीय पाठपारायण, आध्यात्मिक मार्गदर्शन र पावन आशीर्वादले यस महायज्ञलाई अझ दिव्य, सार्थक र स्मरणीय बनाएको छ। उहाँहरूप्रति हाम्रो हृदयदेखि नै श्रद्धा, सम्मान र कृतज्ञता अर्पण गर्दछौँ।

यस महायज्ञको व्यवस्थापकीय तथा संरचनात्मक सफलताका लागि महत्वपूर्ण साझेदारी र सहयोग प्रदान गर्नुहुने हाम्रा मुख्य सहयोगी संस्थाहरू BCA Windsor र 401 Homes Realty प्रति विशेष आभार व्यक्त गर्दछौँ। त्यस्तै, यस सामूहिक सत्कर्ममा ऐक्यबद्धता जनाउँदै संस्थागत सहयोग र सद्भाव प्रदान गर्नुहुने श्री वैष्णव परिषद् क्यानडा, श्रीवैष्णव परिषद् USA, वैदिक सेवा समाज कोलम्बस, अन्तर्राष्ट्रिय निम्वार्क आध्यात्मिक परिषद, विश्व भुटानी हिन्दु संगठन (GBHO)/ओम सेन्टर दिव्य धाम, हिन्दु सनातन परिषद अफ मिसिगन तथा स्थानीय, राष्ट्रिय र अन्तर्राष्ट्रिय सम्पूर्ण धार्मिक एवं सामाजिक संघ-संस्थाहरूप्रति हामी सदैव ऋणी रहनेछौँ।

महायज्ञभरि आफ्नो सुमधुर भजन-कीर्तन, संकीर्तन र भक्तिमय प्रस्तुतिद्वारा सम्पूर्ण वातावरणलाई ईश्वरीय ऊर्जाले गुञ्जायमान बनाउनुहुने सम्पूर्ण भजन टोलीहरू, भक्तजन परिवारहरू तथा व्यक्तिगत रूपमा सहयोग गर्नुहुने महानुभावहरूप्रति पनि हार्दिक धन्यवाद व्यक्त गर्दछौँ।

यस महायज्ञको मेरुदण्डका रूपमा अहोरात्र खटिनुहुने मूल आयोजक समिति, महायज्ञ आयोजक समिति, आदरणीय स्वयंसेवक संयोजक तथा सम्पूर्ण स्वयंसेवकहरू प्रति हाम्रो विशेष कृतज्ञता छ। योजना, व्यवस्थापन, समन्वय र सेवाका हरेक चरणमा तपाईंहरूले देखाउनुभएको धैर्य, अनुशासन र समर्पणले यस महायज्ञलाई सफलताको शिखरसम्म पुर्‍याएको छ।

च्याटम-केन्ट नगरपालिकाबाट प्राप्त नागरिक सेवा, आवश्यक प्रशासनिक सहयोग तथा सहजीकरणका लागि Municipality of Chatham-Kent प्रति हार्दिक आभार व्यक्त गर्दछौँ। साथै, यस महायज्ञको आध्यात्मिक सन्देश र गतिविधिलाई व्यापक समुदाय तथा संसारभर पुर्‍याउन महत्वपूर्ण भूमिका निर्वाह गर्नुहुने सम्पूर्ण सञ्चारमाध्यम तथा सञ्चारकर्मी मित्रहरूप्रति विशेष धन्यवाद ज्ञापन गर्दछौँ।

महायज्ञका हरेक प्राविधिक र व्यवस्थापकीय पक्षलाई सुचारु र व्यवस्थित बनाउन अहोरात्र खटिनुहुने Finance Team, Technical & IT Team, फोटोग्राफर तथा भिडियोग्राफरहरू, Kitchen Crew, Parking Crew, Mandap तथा अन्य भौतिक पूर्वाधार Team, दक्ष इलेक्ट्रिसियन तथा प्लम्बरहरू, Ground Maintenance Team, Cleaners, तथा आवश्यक सेवा प्रदान गर्नुहुने सम्पूर्ण व्यवसायी र Vendors को योगदान वास्तवमै अतुलनीय रहेको छ। तपाईंहरूको निष्ठापूर्ण सेवाबिना यस्तो विशाल आयोजनालाई सफलतापूर्वक सम्पन्न गर्न सम्भव हुने थिएन।

अन्ततः, विशेष रूपमा हाम्रा ऊर्जावान् विद्यार्थी स्वयंसेवकहरू, युवा तथा वयस्क स्वयंसेवकहरू, आदरणीय दाताहरू, सहयोगी परिवारहरू तथा हरेक क्षेत्रमा साथ दिनुहुने सम्पूर्ण समुदायजनप्रति हामी हृदयदेखि नै नतमस्तक छौँ। भीड व्यवस्थापनदेखि भोजन तयारीसम्म, आर्थिक सहयोगदेखि ज्येष्ठ नागरिकहरूको सेवासम्म, सानादेखि ठूला हरेक जिम्मेवारीलाई आफ्नो कर्तव्य ठानी तपाईंहरूले गर्नुभएको निःस्वार्थ सेवा नै यस महायज्ञको वास्तविक शक्ति थियो।

यस महान् सत्कर्ममा जोडिनुहुने प्रत्येक व्यक्ति, परिवार, संस्था, दाता, स्वयंसेवक, भक्तजन र शुभेच्छुकप्रति महायज्ञ आयोजक समितिको तर्फबाट पुनः हार्दिक धन्यवाद तथा अनन्त कृतज्ञता व्यक्त गर्दछौँ।

भगवान् श्रीकृष्णले यहाँहरू सबै तथा सम्पूर्ण परिवारजनमा सुख, शान्ति, सुस्वास्थ्य, समृद्धि र आध्यात्मिक उन्नति प्रदान गरून्। हाम्रो समुदायमा सदैव एकता, सद्भाव, सेवा र सनातन संस्कृतिको ज्योति प्रज्ज्वलित भइरहोस्।

अन्त्यमा दक्षिण-पश्चिम ओन्टारियोमा हिन्दु मन्दिर/सामाजिक भवन स्थापना गर्ने हाम्रो परिकल्पनालाई साथ र समर्थन गर्न र हामीसित जोडिनुहुन सबैमा विनम्रतापुर्वक अनुरोध गर्दछौं।

सबैको जय होस्। श्रीकृष्णार्पणमस्तु।